काठमाडौं । अर्थमन्त्री डा.स्वर्णिम वाग्ले भारत प्रस्थान गरेका छन् । तीन दिने भ्रमणका लागि उनी बिहीबार बिहान भारत प्रस्थान गरेका हुन् । भ्रमणको पहिलो दिन बिहीबार साँझ ५ बजे अर्थमन्त्री वाग्लेले आफ्ना भारतीय समकक्षी निर्मला सीतारमणसँग भेटवार्ता गर्ने कार्यक्रम रहेको छ ।
त्यसैगरी, भ्रमणको दोस्रो दिन शुक्रवार बिहान ९ बजे पूर्वविदेशसचिव श्याम शरणले आयोजना गर्ने उच्चस्तरीय कूटनीतिक संवाद कार्यक्रममा उनी सहभागी हुनेछन् । सोही दिन साँझ ५ बजे भारतीय विदेशमन्त्री डा. एस जयशंकरसँग भेटवार्ता तय गरिएको छ भने साँझ साढे ७ बजे भारत व्यापार सम्वर्दधन सङ्गठनका अध्यक्ष जावेद अश्राफले आयोजना गर्ने भेटघाट कार्यक्रममा पनि उनी सहभागी हुनेछन् ।
भ्रमणको अन्तिम दिन शनिवार बिहान साढे ९ बजे भारतीय उद्योग परिसंघले आयोजना गर्ने प्रतिष्ठित औद्योगिक घरानाहरूसँगको सम्मेलनमा अर्थमन्त्री वाग्ले प्रमुख वक्ताका रूपमा सहभागी हुनेछन् ।
त्यसपछि शनिवार बिहान साढे ११ बजे दिल्ली स्कुल अफ इकोनोमिक्सले आयोजना गर्ने विकास अर्थनीतिसम्बन्धी प्राज्ञिक छलफलमा सहभागिता जनाएर उनी शनिवार साँझ ४ बजे नेपाल फिर्ता हुने कार्यक्रम छ ।
