काठमाडौं । प्रधानमन्त्री केपी शर्मा ओलीले कोरोना भाइरसको संक्रमण नियन्त्रणका लागि तत्कालै देशव्यापी लकडाउन गर्नुपर्ने अवस्था नरहेको बताएका छन् ।
शनिबार बालुवाटारमा बसेको कोभिड १९ संकट व्यवस्थापन केन्द्र (सिसिएमसी)को बैठकलाई ब्रिफ्रिङ गर्दै उनले अहिले नै देशव्यापी लकडाउन गर्नुपर्ने अवस्था नरहेको बताएका हुन् ।
प्रधानमन्त्री ओलीले लकडाउन जारी गर्ने अधिकार स्थानीय तहलाई दिइएको बताए । संक्रमण रोक्न पनि स्थानीय तहले नै कडाइका साथ स्वास्थ्य मापदण्ड लागू गर्नुपर्छ बताए ।
यस्तै, प्रधानमन्त्री ओलीले पछिल्लोपटक सरकारले गरेको निर्णयलाई कडाइको साथ लागू गर्न निर्देशन दिएका छन् ।
सरकारले बैशाख ६ गते जारी गरेको आदेशमा सार्वजनिक स्थलहरुमा भीडभाड नगर्न, २५ जना भन्दा बढी मानिसहरुको जमघट नगर्न, सार्वजनिक सवारी साधनमा स्वास्थ्यसम्बन्धी मापदण्ड लागू गर्न लगायतका आदेश जारी गरेको थियो ।
सरकारी आदेश राजपत्रमा समेत प्रकाशित भइसकेको छ, तर त्यसको पालना कोही कसैबाट पनि भएको छैन । आदेश पालना नभएपछि प्रधानमन्त्री ओलीले यसको कडाइ पूर्वक पालना गराउन शनिबार निर्देशन दिएका हुन् ।
उनले भने- ‘स्वास्थ्य मापदण्डको पालनासम्बन्धी सरकारको आदेश कार्यान्यवन हुनुपर्यो, परीक्षण कम भएको गुनासो आइरहेको छ, त्यसलाई बढाउनुपर्यो, भेन्टिलेटर कम छन् भने थप्नुपर्यो, दातासँग मागेर हुन्छ कि, किनेर हुन्छ, तुरुन्त थप्नुपर्यो ।’