भत्ता नपाएपनि गुनासो छैन, अग्रमोर्चामा लडेकै छन् प्रहरी « Drishti News – Nepalese News Portal
Logo

भत्ता नपाएपनि गुनासो छैन, अग्रमोर्चामा लडेकै छन् प्रहरी


दृष्टि संवाददाता



काठमाडौं । कोभिड–१९ संक्रमणको दोस्रो लहर बढेपछि देशभरी प्रहरीको सक्रियता बढेको छ । संक्रमण रोकथाम तथा नियन्त्रणका लागि नेपाल प्रहरीले पछिल्लो २४ घण्टामा ५ सय ९ वटा सचेतनामूलक कार्यक्रम सम्पन्न गरेको छ । उक्त कार्यक्रममा देशभर गरी जम्मा ३९ हजार ६ सय ४१ जना सहभागी भएका छन् ।


नयाँ भेरियन्ट सहितको कोभिड–१९ को संक्रमण बढ्दै गएको सन्दर्भमा यसबाट सिर्जना हुन सक्ने समस्या र चुनौतीलाई दृष्टिगत गरी संक्रमण रोक्न तोकिएको सुरक्षा मापदण्डलाई दुरुस्त रुपमा कार्यान्वयनका लागि नेपाल प्रहरीले ‘संक्रमणबाट आफू बचौँ र अरुलाई पनि बचाऔँ’ भन्ने नारा सहित ‘तपाईंको मास्क खै ?’ लगायतका विभिन्न सचेतनामूलक कार्यक्रमलाई अभियानकै रुपमा सञ्चालन गरेको हो ।


अभियानको क्रममा पछिल्लो २४ घण्टामा १० हजार ७ सय ९४ जनालाई निःशुल्क मास्क वितरण गरिएको छ । मास्क नलगाई हिँडडुल गर्ने ३३ हजार ७ सय १५ जनालाई होल्डिङ जोनमा राखी सम्झाई बुझाई छाडिएको छ । तोकिएको मापदण्ड उल्लंघन गर्ने १ हजार ८६ जनालाई संक्रामक रोग ऐन, २०२० बमोजिम जरिवाना गरिएको छ ।

कार्यक्रम अन्तर्गत नेपाल प्रहरीले विभिन्न स्थानहरूमा कोभिड–१९ को जोखिम न्यूनीकरणको लागि सचेतनामूलक सन्देश सहितको माइकिङ, सवारी साधनहरूको चेकजाँच, सचेतनामूलक प्लेकार्ड प्रदर्शन लगायतका कार्यक्रमहरू मार्फत मास्क तथा स्यानिटाइजरको सहि प्रयोग र नियमित मास्क लगाउन सबैमा अनुरोध समेत गरेको छ ।


कार्यक्रमलाई थप प्रभावकारी र सफल बनाउन नेपाल प्रहरीले अन्य सुरक्षा निकाय लगायतका सरोकारवालाहरुसँग आवश्यक समन्वय, सहकार्य गरी अनुगमनलाई समेत तिब्रता दिएको छ ।

गत वर्ष चैतदेखि नै प्रहरी कोभिडविरुद्ध अग्रमोर्चामा छ । सरकारले घोषणा गरेको जोखिम भत्ता पनि उनीहरुलाई दिएन । तर, यसले प्रहरीले आफ्नो जिम्मेवारीमा अलिकति पनि तलमाथि गरेको छैन । देशप्रतिको आफ्नो भूमिकालाई जिम्मेवारीसाथ निभाइरहेको छ ।

प्रतिक्रिया दिनुहोस्