नक्कली स्टिकर प्रकरण : क्षेत्रीलाई जोगाउन फितलो अनुसन्धान « Drishti News – Nepalese News Portal
Logo

नक्कली स्टिकर प्रकरण : क्षेत्रीलाई जोगाउन फितलो अनुसन्धान


दृष्टिन्यूज


बुटवल । नक्कली स्टिकर प्रयोग गर्ने डिस्टिलरीलाई कारबाही गरेजस्तो गर्ने तर शक्तिकेन्द्रको दबाबमा उन्मुक्ति दिने घुमाउरो प्रयास भएको छ । नक्कली स्टिकर प्रयोग गरेर अर्बौ राजस्व छल्ने डिस्टिलरी सञ्चालकले कारबाहीबाट बच्न विभिन्न प्रपन्च गरिरहेको बेला गहन अनुसन्धानविनै उच्च अदालत तुल्सीपुर, बुटवल इजलासमा राजस्व अनुसन्धान विभागले मुद्दा दायर गरेको छ ।

राजस्व छलीमा संलग्नहरूलाई बच्न सजिलो हुने गरी उद्योगीसहित १० जनाविरुद्ध मुद्दा दर्ता भएको स्रोतको दाबी छ । विभागले पाँच करोड ५६ लाख ४३ हजार विगो दाबीसहित गत हप्ता मुद्दा दायर गरेको हो ।

सञ्चालक फूलसिंह क्षेत्री

रुपदेही सिद्धार्थनगर नगरपालिका–१३ का क्रिष्टल बोटलर्स प्रालिका सञ्चालक फूलसिंह क्षेत्री, क्रिष्टल बोटलर्सका सञ्चालक प्रदीप क्षेत्री, सिद्धार्थनगरकै माउन्ट एभरेष्ट डिष्ट्रिलरीका सञ्चालक मृगेन्द्र गोविन्द श्रेष्ठ, मोहम्दसहिद अन्सारीविरुद्द विभागले मुद्दा दायर गरेको छ । यस्तै, माउन्ट एभरेष्ट डिष्ट्रिलरीका सञ्चालक प्रतिभा क्षेष्ठ, बुटवल मैत्रीपथ घर भएका माउन्ट एभरेष्ट डिष्ट्रिलरीका मुख्य कारोबारकर्ता प्रविन्द्र गोविन्द श्रेष्ठ, सिद्धार्थनगर ३ का अमानत अलि, बुटवलका राजा कसौधन, लालबन्दीका हरिप्रसाद पौडेल, नुवाकोट तादी घरभई तिलोत्तमा बस्ने कुलबहादुर पण्डितलाई विभागले प्रतिवादी बनाएको छ ।

फितलो अनुसन्धान
गत भदौ ५ गते नक्कली स्टिकरसहित दुई जनालाई सशस्त्र प्रहरीले पक्राउ गरेपनि उक्त स्टिकर कुन मदिरा उद्योगमा प्रयोग गर्न ल्याइएको हो भन्ने अझै खुल्न सकेको छैन् । अनुसन्धानमा सक्रिय रहनुपर्ने राजस्व अनुसन्धान विभागले गहन रुपमा काम नगरेको स्रोतको दाबी छ । स्रोतका अनुसार पैसाकै चलखेलमा विगतदेखि नै गलत काम हुँदै आएको छ ।

यस घटनामा क्रिष्टल डिष्टिलरीका मालिक क्षेत्रीले आफू जोगिन बालुवाटारसम्म पहुँच बनाएका थिए । क्षेत्रीको अस्वभाविक चलखेलका कारण पनि उक्त स्टिकर क्रिष्टल डिष्टिलरीकै भएको दाबी गरिए पनि विभागको फितलो अनुसन्धानका कारण क्षेत्री जोगिने सम्भावना बढी छ । क्षेत्री नक्कली स्टिकर काण्डमा पटक–पटक पक्राउ परेका व्यक्ति हुन् । उनले गरेको अपराध भण्डाफोर गर्दा उनले यस दृष्टि अनलाइनविरुद्ध काठमाडौं जिल्ला अदालतमासमेत मुद्दा दर्ता गराएका छन् ।

नक्कली स्टिकर भित्र्याउने र प्रयोग गर्ने कतिपय उद्योगीलाई राजस्वका उच्च कर्मचारीदेखि मन्त्रीसम्मले बचाउन चलखेल गरिरहेका छन् । मुद्दा दायर भए पनि अनुसन्धान फितलो पारी उद्योगीलाई बचाउन उनीहरूले दबाब दिने गरेको स्रोतको दाबी छ ।

राजस्वकै कर्मचारीको मिलेमतो
उद्योग सञ्चालकहरूले अर्को उद्योगसँग मिल्दो नम्बरको नक्कली स्टिकर टाँस्नेदेखि विभागले जारी गरेकै जस्तो फर्जी स्टिकर टाँसेर मदिरा बेच्ने गरेका छन् । मुलतः मदिरा उद्योगमा प्रयोग हुने स्टिकर राजस्वका कर्मचारीबाहेक अरुको रोहबरमा प्रयोग हँुदैन । मदिरा उद्योगमा प्रयोग हुने स्टिकरमा राजस्वका कर्मचारीको मिलेमतो विना बदमासी हुन नसक्ने एक उद्योगीको दाबी छ । तर, विभागले गहिरो अनुसन्धान नगरेकोले अभियुक्तहरुले उन्मुक्ति पाउने गरेको स्रोतको दाबी छ ।

रुपन्देहीमा यसअघि पनि मदिरा उद्योगमा प्रयोग हुने स्टिकरमा बदमासी भएको थियो । स्रोतका अनुसार भारतमा नक्कली स्टिकर छापेर रुपन्देही, नवलपरासी, कपिलबस्तुलगायत जिल्लामा भित्रिने गरेको छ । अहिले पनि नक्कली स्टिकर भित्रिने क्रम नरोकिएको राजस्वकै एक कर्मचारीले बताए । तर, नक्कली स्टिकर कुन उद्योगले प्रयोग गरिरहेको छ भन्नेबारे सबैले थाहा पाएर पनि तै चुप मै चुपको अवस्था छ । सेटिङमै मुद्दा दर्ता भएकोले आरोपीले अदालतमा नक्कली स्टिकर प्रयोग गरेको स्वीकार्ने अवस्था देखिदैन । नक्कली स्टिकरका कारण राज्यले अर्बौँ रकम गुमाइरहेको छ । तर, पनि सरोकारवाला निकाय गहन अनुसन्धानमा चुक्दै आएको छ ।

क्रिष्टल डिष्टिलरीको आवश्यक कागजपत्र नियन्त्रणमा लिएर उद्योग भने चालु गर्न दिइएको छ । अनुसन्धानमा बाधा नपुग्ने, कर्मचारीलाई समस्या नपर्ने र राजस्व घाटा नहुनेगरि उद्योग संञ्चालन गर्न दिइएको विभागका कर्मचारी बताउँछन् । राजस्वकै कर्मचारीको मिलेमतोमा नक्कली स्टिकर भित्रिदै आएको जानकार बताउँछन् ।

शसस्त्र प्रहरी बल डण्डा बोर्डर आउट पोष्टबाट शसस्त्र प्रहरी निरीक्षक कृष्णप्रसाद अर्यालको कमाण्डमा खटिएको टोलीले भैरहवाको दरखसवाबाट ८० रोल नक्कली स्टिकर बरामद गरेको थियो । जुन स्टिकर नियन्त्रणमा लिएर राजस्व अनुसन्धान कार्यालय बुटवलमा बुझाइएको थियो । रुपन्देहीको सिद्धार्थनगर नगरपालिका–३ दरखसवाको एउटा घरमा लुकाएर राखेको अवस्थामा प्रहरीले खानतलासी गरि स्टिकर बरामद गरेको थियोे । आन्तरिक राजस्व विभाग लेखिएको उक्त स्टिकर दुई करोड ३५ लाख ६३ हजार बराबरको रहेको कार्यालयको प्रारम्भिक विवरणबाट देखिएको छ । तर पनि यसमा अन्तशुल्क मात्र नभएर आयकरसमेत जोडिने भएकाले करिब पाँच करोडको राजस्व छली भएको सरोकारवाला बताउँछन् ।

यस घटनामा क्रिष्टल डिष्टिलरीका मालिक क्षेत्रीले आफू जोगिन बालुवाटारसम्म पहुँच बनाएका थिए । क्षेत्रीको अस्वभाविक चलखेलका कारण पनि उक्त स्टिकर क्रिष्टल डिष्टिलरीकै भएको दाबी गरिए पनि विभागको फितलो अनुसन्धानका कारण क्षेत्री जोगिने सम्भावना बढी छ । क्षेत्री नक्कली स्टिकर काण्डमा पटक–पटक पक्राउ परेका व्यक्ति हुन् । उनले गरेको अपराध भण्डाफोर गर्दा उनले यस दृष्टि अनलाइनविरुद्ध काठमाडौं जिल्ला अदालतमासमेत मुद्दा दर्ता गराएका छन् ।

प्रतिक्रिया दिनुहोस्