काठमाडौं । नेपाल प्रहरीमा यही साता नेतृत्व परिवर्तन हुँदैछ । तर, विगतमा जस्तो प्रहरी नेतृत्वका लागि सतहमा अस्वस्थ प्रतिस्पर्धा देखिएको छैन ।
३० वर्षे सेवाहदको प्रावधान हेरफेर नभएमा प्रहरी महानिरीक्षक धिरजप्रताप सिंह र उनका ब्याचका अधिकारीले शुक्रबारदेखि अनिवार्य अवकाश पाउनेछन् । त्यो अवस्थामा सोमबार मात्र बढुवा भएका पाँच एआइजीमध्येबाट एक आइजिपी हुनेछन् । पाँचैजना प्रधानमन्त्री पुष्पकमल दाहाल ‘प्रचण्ड’को विश्वास जित्ने प्रयासमा छन् । सबैले शक्ति केन्द्रमा आ–आफ्नो तर्फबाट लबिइङ गरेपनि विगतमा जस्तो आइजी बन्नका लागि फोहोरी खेल खेलेको भने देखिएको छैन । जसकारण जो आइजिपी भएपनि यसपटक विवादमुक्त हुने सम्भावना छ ।
सोमबारको मन्त्रिपरिषद्को बैठकले बसन्तबहादुर कुँवर, टेकप्रसाद राई, दिपक थापा, श्यामलाल ज्ञवाली र किरण बज्राचार्यलाई एआइजीमा बढुवा गरेको थियो । एक नम्बरमा एआइजी भएकाले कुँवरको सम्भावना बढी छ । तर, यसअघि विश्वराज पोखरेलले दायर गरेको मुद्दामा सर्वाेच्च अदालतले आइजिपी नियुक्तिको अधिकार सरकारको भएकाले सिनियरमध्येबाट जसलाई पनि रोज्न सक्ने फैसला गरेको छ । जसआधारमा अरुको सम्भावना पनि उत्तिकै छ ।
प्रतिस्पर्धीमध्ये एआइजी दिपक थापा प्रधानमन्त्री प्रचण्डनिकट मानिन्छन् । यद्यपि, थापा पछि पनि आइजिपी हुन सक्ने भएकाले अन्य चार जनामध्येबाट बढुवा गर्नेबारे बालुवाटारमा छलफल भइरहेको बताइन्छ । अन्य चार जनामध्ये प्रधानमन्त्रीका विश्वासपात्र कोही छैनन् । अर्काेतर्फ आइजिपी नियिुक्तिमा प्रचण्डले कांग्रेस सभापति शेरबहादुर देउवासँग पनि छलफल गरिरहेका छन् ।
सत्ता गठबन्धनको प्रमुख दल नेपाली कांग्रेस भएकाले आइजिपी नियुक्तिमा कांग्रेसको पनि भूमिका हुने निश्चित छ । पहिलो नम्बरमा रहेका कुँवर नै नेपाली कांग्रेसनिकट भनेर चिनिन्छन् । कांग्रेसले कुँवरलाई नै अघि सारेमा उनको सम्भावना धेरै रहेको बताइन्छ ।
समाचार स्रोतका अनुसार पछिल्लो समय चौथो नम्बरका श्यामलाल ज्ञवालीको पनि प्रधानमन्त्रीसँग निकटतम सम्बन्ध रहेको बताइन्छ । पाँचौ नम्बरकी किरण बज्राचार्य पनि पहिलो महिला आइजिपी भएर इतिहास रच्ने प्रयासमा छिन् । टेकप्रसाद राईले पनि राजनीतिक भेटघाट बढाएका छन् । प्रधानमन्त्री प्रचण्ड यसपटक विगतमा जस्तो आइजिपी नियुक्तिको विवादमा नपर्ने रणनीतिका साथ अघि बढेको बालुवाटार स्रोतले बताएको छ ।
