नेपाल उद्योग वाणिज्य महासंघको विधान संशोधन गर्ने कि नगर्ने भन्ने भन्दा पनि संशोधित विधान कहिलेदेखि लागू गर्ने भन्ने विवाद चर्किएपछि विधान संशोधनका लागि कात्तिक २८ गते बोलाइएको बैठक अलपत्र परेको छ ।
विधान संशोधन गरेर प्रत्यक्ष निर्वाचित अध्यक्षको व्यवस्था गरिनुपर्ने एजेण्डामा सबैको सहमति भए पनि प्रत्यक्ष निर्वाचित अध्यक्षको निर्वाचन कहिलेदेखि लागू गर्ने भन्ने विवाद महासंघमा चुलिएको थियो । यस विषयमा सात जना पूर्वअध्यक्षहरुले आफ्नो धारणा राख्दै अहिले विधान पास भए पनि त्यो विधान तीन वर्षपछि मात्र लागू गर्ने अडान लिएका थिए । यसैबीच पूर्वअध्यक्ष पशुपति मुरारकाले विधान संशोधनको प्रक्रिया नमिलेको र प्रक्रियागत ढंगबाट मात्र विधान संशोधन गर्न आग्रह गरेपछि विधान संशोधन समितिका संयोजक चण्डीराज ढकाल पछाडि हटेका छन् ।
महासंघ स्रोतका अनुसार, अहिले विधान संशोधन गर्ने र त्यही विधानअन्तर्गत आगामी चैतमा महासंघको अध्यक्षको प्रत्यक्ष निर्वाचन गर्ने कुरामा महासंघका पदाधिकारीहरुबीच सहमति भए पनि पछिल्लो समय अध्यक्ष भवानी राणासमेत यसको विपक्षमा उभिएपछि ढकालको रणनीतिले हावा खाएको छ ।
चण्डीराज ढकालका अनुसार अब विधान संशोधन समितिको बैठक बस्न पनि समय छैन । किनभने, संशोधित विधान प्रमुख जिल्ला अधिकारी, गृह मन्त्रालय हुँदै मन्त्रिपरिषद्को बैठकले पास गर्नुपर्ने हुन्छ । विधान समितिको बैठक नै अनिश्चित भएपछि के को विधान संशोधन गर्ने ? ढकाल प्रतिप्रश्न गर्छन् । यस्तो अवस्था किन सिर्जना भयो भन्ने दृष्टिको प्रश्नमा ढकाल भन्छन्– पहिला सबैले हुन्छ भने र मेरो संयोजकत्वमा विधान संशोधन समिति बनाइयो, अहिले सबैले धोका दिए । अब विधान संशोधन कहिले हुन्छ त भन्ने अर्को एक प्रश्नको उत्तरमा ढकाल भन्छन्– के एउटा व्यक्तिलाई अध्यक्ष बनाउन र नबनाउन विधान संशोधन गर्ने हो र ? त्यो त संगठनको आवश्यकताअनुसार योग्यता, क्षमता हेरेर प्रतिस्पर्धाको माध्यमबाट अध्यक्ष बनाउन पो विधान संशोधनको कुरा उठेको हो । ढकाल भन्छन्– अब त विधान संशोधन गर्छु भनेर भन्यो भने पनि मैले मान्दिनँँ ।
महासंघभित्र विधानको विषयलाई लिएर विवाद चर्किएपछि आगामी चैत २८–२९ गते हुने साधारणसभालाई अहिलेकै विधानले निरन्तरता दिनेछ । अहिलेको विधानअनुसार वरिष्ठ उपाध्यक्ष नै स्वतः अध्यक्ष बन्नेछन् । तीन वर्ष अगाडि ढकालकै पहलमा वरिष्ठ उपाध्यक्षलाई अध्यक्ष बनाउन विधान संशोधन गरिएको थियो । सोही विधानबमोजिम भवानी राणा अध्यक्षमा चुनिएकी थिइन् । तर, तीन वर्षपछि वरिष्ठ उपाध्यक्ष शेखर गोल्छालाई नेतृत्वमा आउन नदिने नियतले विधान संशोधनको मुद्दा उठाइएपछि त्यसका विरुद्ध पूर्वअध्यक्षहरु पद्म ज्योति, महेशलाल प्रधान, विनोदबहादुर श्रेष्ठ, रविभक्त श्रेष्ठ, कुशकुमार जोशी, प्रदीपकुमार श्रेष्ठ र सुरज वैद्य त्यसको विपक्षमा उभिएका थिए । महासंघको इतिहासमा पूर्वअध्यक्षहरुले निर्णायक भूमिका खेल्ने गरेको इतिहास छ । महासंघको सम्पत्ति र गौरवमय इतिहास भनेको पनि यही नै हो ।
