चीनद्वारा कोटेश्वर–कलंकी सडक हस्तान्तरण « Drishti News – Nepalese News Portal
Logo

चीनद्वारा कोटेश्वर–कलंकी सडक हस्तान्तरण


- दृष्टि न्युज/संवाददाता



काठमाडौं, १४ माघ । चीन सरकारले गत महीना निर्माण सम्पन्न गरेकोे कोटेश्वर–कलंकी सडक सोमबार नेपाल सरकारलाई हस्तान्तरण गरेको छ ।
खुमलटारस्थित राष्ट्रिय प्रकृति संरक्षण कोषको कार्यालयमा आयोजित ‘चिनियाँ सहयोगमा निर्माण भएको काठमाडौं चक्रपथ सुधार परियोजना हस्तान्तरण कार्यक्रम’ मा प्रधानमन्त्री केपी शर्मा ओलीलाई नेपालका लागि चीनका राजदूत हउ याङ्चीले साँचो दिँदै सो सडक हस्तान्तरण गरे । सो अवसरमा उनीहरुले संयुक्तरुपमा सडकको उद्घाटन पनि गरेका थिए ।
कार्यक्रममा प्रधानमन्त्री ओलीले नेपाल र चीनबीच समस्यारहित र अनुपम सम्बन्ध रहेको बताए । उनले भने, ‘सडक, कृषि, शिक्षा, स्वास्थ्यलगायतका धेरै क्षेत्रमा चीन सरकारले नेपाललाई सहयोग गर्दै आएको छ ।’
चक्रपथको पहिलो खण्डमा देखिएको समस्या कलंकी– महाराजगञ्ज सडक (दोस्रो खण्ड) मा दोहोरिइन नदिने उनले प्रतिबद्धता जनाए । खानेपानीको पाइप, बिजुलीको खम्बालगायत सडक निर्माणमा अवरोध भए समयमा नै हटाएर काम सञ्चालन गर्न दिन प्रधानमन्त्रीले सबै मन्त्रालय र विभागलाई निर्देशन दिए ।
‘तपाईँले समाधान गर्न सक्नुभएन भने मन्त्रिपरिषद्मा लैजानुहोस्, हामी समाधान गर्छाै’, उनले भने, ‘तर निर्माण कम्पनी सामान र सामथ्र्य लिएर उसै बस्नुपर्ने अवस्था आउन दिनुहुँदैन ।’
नेपालका लागि चिनियाँ राजदूत हउले निर्माण सम्पन्न भएको सडकबाट नेपाल चीनबीच सुमधुर सम्बन्ध रहेको प्रमाणित गरेको बताए । यो सडकले चीनको नै सहयोगमा निर्माण भएको अरनिको राजमार्ग र पृथ्वी राजमार्गलाई जोडेको उनले बताए । नेपाल र चीनका बीचमा मित्रवत् सम्बन्ध अझै बलियो बन्दै गएको पनि उनले औँल्याए ।
भौतिक पूर्वाधार तथा यातायात मन्त्रालयका सचिव मधुसूदन अधिकारीले सबै पक्षको सहयोगका कारण सडक निर्माण सम्पन्न भएको बताए । कार्यक्रममा सडक विभागका महानिर्देशक रवीन्द्रनाथ श्रेष्ठले चक्रपथको दोस्रो चरणको काम चाँडो शुरु हुने जानकारी दिए । रासस

प्रतिक्रिया दिनुहोस्