जार्काता । इन्डोनेसियामा सांसदहरूलाई दिइने सुविधाका विरुद्ध सुरु भएको प्रदर्शन हिंसात्मक बन्दै गर्दा कम्तीमा २० जना अझै बेपत्ता भएको मानवअधिकार समूहले मंगलबार जानकारी दिएको छ ।
गत हप्तादेखि जारी भएका प्रदर्शनमा दुखद रूपमा कम्तीमा ६ जनाको मृत्यु भएको छ । यस विषयमा प्रतिक्रिया स्वरूप राष्ट्रपति प्रभावो सुबियांतोले सांसदहरूको सुविधामा कटौती गर्ने निर्णय गरेका छन् ।
अधिकार समूह कन्क्ट्रासले २३ जनाको बेपत्ता भएको रिपोर्ट प्राप्त भएको र खोजी कार्यपछि २० जना अझै फेला नपरेको जनाएको छ । बेपत्ता हुनेहरू अधिकांश जाभा टापुको बन्दुंग, डेपोक र जकार्ताका विभिन्न प्रशासनिक क्षेत्रमा रहेका छन् ।
यस सम्बन्धमा राष्ट्रिय प्रहरीले अहिलेसम्म कुनै प्रतिक्रिया नदिएको बताइएको छ । जकार्तामा अगष्ट २५ देखि हालसम्म एक हजार २४० भन्दा बढी प्रदर्शनकारीलाई नियन्त्रणमा लिइएको छ ।
प्रहरीले एक जना प्रमुख आन्दोलनकारीलाई ‘अराजकता फैलाउने’ आरोपमा पक्राउ गरेको जानकारी दिएका छन् । मध्य जाभामा पनि एक हजार ७०० भन्दा बढी प्रदर्शनकारीलाई नियन्त्रणमा लिइएको छ, जसमा धेरैजसो किशोरकिशोरीहरू रहेका छन् ।
संयुक्त राष्ट्र मानवअधिकार कार्यालयले प्रदर्शनकारीमाथि आवश्यकभन्दा बढी बल प्रयोग भएको आरोपको सत्यतथ्य छानबिन गर्न आग्रह गरेको छ ।
प्रदर्शनहरू जकार्ता, बन्दुंग, पलमबाङ, बन्जरमसिन, योगयकार्ता र मकासार लगायतका विभिन्न शहरहरूमा जारी रहेका छन् । सोशल मिडिया प्लेटफर्म टिकटोकले तीन दिनको निलम्बनपश्चात आफ्नो लाइभ सेवा पुनः सुरु गरेको जनाएको छ ।
मानव अधिकारका उप निर्देशक मीनाक्षी गांगुलीले सुरक्षा निकायहरूले प्रदर्शनलाई अत्यन्त संवेदनशीलतापूर्वक ह्यान्डल गर्नुपर्ने र छानबिन आवश्यक रहेको उल्लेख गरेका छन् ।
