काठमाडौं । काठमाडौंको टोखा नगरपालिका-९ स्थित नयाँ बसपार्क नजिकै तेस्रो लिङ्गीको हत्या भएको घटनामा एक जना पक्राउ परेका छन् । जिल्ला प्रहरी परिसर काठमाडौंले हत्या आरोपमा एक जनालाई पक्राउ गरेको हो । ती व्यक्तिको पहिचान भने खुलाइसकेको छैन ।
पक्राउ परेका व्यक्तिसँग प्रहरीले सोधपुछ गरिरहेको छ । शनिवार दिउँसो बसपार्क नजिकैको सडक किनारमा तेस्रो लिङ्गीको शव भेटिएको थियो । शव रहेको भन्ने सूचना आएपछि प्रहरीको टोली घटनास्थल पुगेर अनुसन्धान सुरु गरेको थियो । घटनास्थल मुचुलका गर्दा तन्नाले बरेर पोको पारिएको अवस्थामा शव भेटिएको थियो ।
सोही तन्नालाई आधार मानेर प्रहरीले अनुसन्धान अघि बढाएको थियो । सो क्रममा उक्त तन्ना कुन होटलको भन्ने खुलेको थियो । त्यसपछि उक्त होटल बस्ने व्यक्तिको विवरण केलाएर प्रहरीले अनुसन्धान अघि बढाएको थियो । तेस्रो लिङ्गीको श पोस्टमार्टमका लागि प्रहरीले त्रिवि शिक्षण अस्पतालमा राखिएको छ । उनको अहिलेसम्म सनाखत हुन सकेको छैन ।
