काठमाडौं । नेकपा एमालेले आसन्न ११औँ महाधिवेशनका लागि नारा तय गरेको छ । बुधबार पार्टी केन्द्रीय कार्यालय च्यासलमा बसेको ११औँ राष्ट्रिय महाधिवेशनको सचिवालय बैठकले नारा तय गरेको एमाले प्रचार विभाग प्रमुख राजेन्द्र गौतमले जानकारी दिएका हुन् ।
बैठकमा महाधिवेशनको तयारीका लागि बनेका १२ वटा समितिहरूले आफ्नो आफ्नो समितिको क्षेत्राधिकारभित्र रहेर गरिएका काम र गर्न बाँकी कामका बारेमा जानकारी दिँदै उनले महाधिवेशनमा प्रस्तुत गर्न लागेको लोगोको बारेमा पनि छलफल भएको बताए ।
उनका अनुसार पार्टीको महाधिवेशनको मुख्य नारा ‘निर्णायक राष्ट्रिय शक्ति निर्माणको संकल्पः समृद्ध नेपाल र सुखी नेपाली हाम्रो गन्तव्य’ रहेको तय भएको छ । आफूहरूले संवैधानिक हिसाबले अद्यावधिक गर्नका लागि निर्वाचन आयोगमा दल दर्ता गरेको र यो नियमित काम भएको उनको भनाइ छ ।
