काठमाडौं । अमेरिकी राष्ट्रपति डोनाल्ड ट्रम्पले इरानसँगको सैन्य कारबाही अस्थायी रूपमा स्थगित भएको बताएका छन् । उनले अमेरिका र इरानबीच पछिल्ला दुई दिनमा अत्यन्त सकारात्मक वार्ता भएको जानकारी दिए ।
मध्यपूर्वमा जारी तनाव समाधान गर्ने उद्देश्यले दुवै देशबीच गहन र रचनात्मक संवाद भइरहेको ट्रम्पले बताएका छन् ।
ट्रम्पका अनुसार यी वार्ताहरू विस्तृत, गहिरो र सहमतितर्फ उन्मुख रहेका छन् र आगामी दिनहरूमा पनि निरन्तर जारी रहनेछन्। वार्ताको सकारात्मक वातावरणलाई ध्यानमा राख्दै उनले अमेरिकी रक्षा निकायलाई इरानका ऊर्जा संरचना र विद्युत् केन्द्रहरूमाथि गर्ने भनिएका सबै सैन्य आक्रमणहरू पाँच दिनका लागि स्थगित गर्न निर्देशन दिएका छन् ।
उनले यो निर्णय जारी वार्ता सफल हुने अपेक्षामा आधारित रहेको स्पष्ट पारेका छन् । वार्ताले सकारात्मक नतिजा ल्याए क्षेत्रीय तनाव कम हुने र दीर्घकालीन समाधानको बाटो खुल्ने ट्रम्पको विश्वास छ ।
मध्यपूर्वमा पछिल्लो समय बढ्दो तनावबीच अमेरिका-इरानबीचको यो संवादलाई अन्तर्राष्ट्रिय समुदायले महत्त्वपूर्ण रूपमा हेरिरहेको छ ।
