प्रचण्डमाथि संसदमा महेश बस्नेतको व्यंग्यात्मक कविता- ‘ओलीका अगाडि मेरो केही लागेन’ « Drishti News – Nepalese News Portal
Logo

प्रचण्डमाथि संसदमा महेश बस्नेतको व्यंग्यात्मक कविता- ‘ओलीका अगाडि मेरो केही लागेन’


दृष्टि संवाददाता


काठमाडौं । नेकपा एमालेका सांसद महेश बस्नेतले नेकपा माओवादी केन्द्रका अध्यक्ष पुष्पकमल दाहालप्रति व्यंग्य गरेका छन् ।

प्रतिनिधिसभा बैठकको शून्य समयमा कवितात्मक शैलीमा प्रस्तुत हुँदै सांसद बस्नेतले बिम्बात्मक रुपमा गत निर्वाचनदेखि हालसम्म माओवादी अध्यक्ष दाहाल लाचार रुपमा प्रस्तुत भएको आरोप लगाए ।

एमाले सांसद बस्नेतले प्रचण्डमाथि टिप्पणी गर्दै सुनाएको कविता जस्ताको त्यस्तै–

चुनाव अगाडि गठबन्धन बनाएँ
चुनाव जितेपछि एकीकरण गराएँ
सरकार बनाउँदा आधा कार्यकाल मागेँ
कार्यकारी अध्यक्ष पाएपछि भैगो भनेर छाडें
कार्यकारी प्रयोग गरी अध्यक्ष र प्रधानमन्त्रीको राजीनामा मागेँ

संसद विघटन गरेर परिवर्तनको घोषणा गरी
निर्वाचनको घोषणा गरेर लोकतन्त्र संकटमा पर्‍यो भनेर कराएँ
प्रतिगमन भयो भनेर चिच्याएँ
आन्दोलन गराएँ
मिसन मिडिया चलाएँ
वकिल नागरिक समाज उचालेँ
अदालत गुहारेँ
निर्वाचन आयोग धाएँ
माइतीघर मण्डलामा सूर्यको चिन्ह लगाएँ
सेटिङको हल्ला चलाएँ
संसदीय दलको नेता बनेँ,
अध्यक्ष घोषणा गरें
११ गतेको फैसलाले मख्ख परेँ,
लड्डु खाएँ, अवीर दलेँ
काँग्रेस र जसपाको अफिस धाएँ
नागरिक समाजको डबली धाएँ
२३ गतेको फैसलापछि आफ्नो साइजमा आएँ

विश्वासको मत फिर्ता लिन्छु भन्छु, सक्दिनँ
अविश्वासको प्रस्ताव ल्याउँछु भन्छु, सक्दिनँ
नयाँ गठबन्धन बनाउन खोज्छु, सक्दिनँ
प्रधानमन्त्री बन्नोस् भन्दा कसैले टेर्दैन
अब प्रधानमन्त्रीले विश्वासको मत लिनैपर्छ
नैतिकताका आधारमा राजीनामा दिनैपर्छ

लडाकू प्रकरण नउठाउने र हेग नलैजाने कोही तयार छ भने
प्रधानमन्त्रीको सिट खाली छ,
केपी ओलीका अगाडि मेरो केही लागेन
जसपा मानेन
काँग्रेस जागेन !
धन्यवाद ।

भिडियाे

प्रतिक्रिया दिनुहोस्