कञ्चनपुर । गृहमन्त्री रमेश लेखकले निर्माण व्यवसायीलाई समयमै र गुणस्तरीय रूपमा पूर्वाधार निर्माण गर्न आग्रह गरेका छन्।
दोधारा चाँदनीमा आयोजित निर्माण व्यवसायी संघको २८औँ साधारणसभा तथा १५औँ अधिवेशनमा बोल्दै उहाँले समयमै काम नहुँदा लागत बढ्ने र राज्यको सम्पत्तिमा अपव्यय हुने बताए।
गृहमन्त्री लेखकले शान्तिसुरक्षाको जिम्मा सरकारले लिने उल्लेख गर्दै चन्दा असुली र धम्की दिने कार्य सह्य नहुने चेतावनी दिए।
उनले निर्माण क्षेत्रमा देखिएका समस्या समाधानमा सरकार लागिपरेको भन्दै, सरकारी तथा निजी निकायको क्षमता अभिवृद्धि जरुरी भएको उल्लेख गरे।
नीतिगत सुधार, सुशासन र दण्डहीनताको अन्त्यमार्फत विकास निर्माण अगाडि बढाउने सरकारको प्राथमिकता रहेको बताउँदै उहाँले व्यवसायीलाई निर्धक्कसँग काम गर्न आग्रह गरे।
सरकारले व्यवसायीको बक्यौता रु ३५ अर्ब भुक्तानी गरिरहेको जानकारी पनि उहाँले दिए।
