सुडान घोटालाका दोषी भारती पक्राउ, आजै जेल चलान « Drishti News – Nepalese News Portal
Logo

सुडान घोटालाका दोषी भारती पक्राउ, आजै जेल चलान


- दृष्टि न्युज/संवाददाता


काठमाडौं, १३ भदौं । चर्चित  सुडान घोटालाका प्रकरणमा दोषी ठहर भएका शम्भु भारतीलाई प्रहरीले पक्राउ गरेको छ । नेपाल प्रहरीले सुडानमा खटिने राष्ट्रसंघीय मिसनका लागि आवश्यक सामग्री खरीदमा भएको घोटाला उनलाई दोषी ठहर गरेको थियो । विशेष अदालतले सुडान घोटला काण्डमा विसं २०७४ वैशाख १७ गते दोषी ठहर गरेको भारतीलाई नेपाल प्रहरी केन्द्रीय अनुसन्धान ब्यूरोको टोलीले आज बिहान ललितपुरको भैँसेपाटीबाट पक्राउ गरेको हो ।
ब्यूरोका प्रवक्ता एवं प्रहरी उपरीक्षक दीपक रेग्मीले विशेष अदालतबाट दोषी ठहरपछि फरार भएका भारतीलाई पक्राउ गरेको जानकारी दिए । भारतीले सुडान मिसनका लागि आवश्यक सामग्री आपूर्तिमा घोटाला गरेका थिए ।
भारतीलाई अदालतले एक वर्ष कैद र रु १४ करोड २० लाख आठ हजार जरिवाना तोकेको थियो । डडेलधुरा निवासी भारती हाल ललितपुरको भैँसेपाटी बस्दै आएका थिए । पक्राउ परेका भारतीलाई फैसला कार्यान्वयनका लागि ब्यूरोले शुक्रबार नै अदालतमा पेश गरेकोमा अदालतले उनलाइ जेल चलान गराएकाे छ ।
अदालतले सुडान घोटालाको मुद्दामा तत्कालीन महानिरीक्षकहरु ओमविक्रम राणा, हेमबहादुर गुरङ, रमेशचन्द्र ठकुरीलाई दोषी ठहर गरी सजायसमेत गरिसकेको छ ।

प्रतिक्रिया दिनुहोस्