ओलीसँग सत्ता साझेदारी नगर्ने पक्षमा बाबुराम भट्टराई « Drishti News – Nepalese News Portal
Logo

ओलीसँग सत्ता साझेदारी नगर्ने पक्षमा बाबुराम भट्टराई


दृष्टि संवाददाता


काठमाडौं। जनता समाजवादी पार्टी (जसपा) ले बिहीबार साँझ प्रधानमन्त्री निवास बालुवाटार पुगेर प्रधानमन्त्री केपी शर्मा ओलीसँग छलफल गरेको छ । सत्ता गठबन्धनको सरकार बनिरहेको अवस्थामा भोलि माओवादीले समर्थन फिर्ता लिने बित्तिकै अल्पमतमा पर्ने देखिएपछि एमाले अध्यक्ष एवं प्रधानमन्त्री ओलीले जसपासँग सहकार्यका लागि बिहीबार छलफल गरेका हुन् ।

यसअघि नै जसपाका अध्यक्ष महन्थ ठाकुर र प्रधानमन्त्रीबीच पनि छलफल हुँदै आएको थियो । तर, औपचारिक रूपमा भने बिहीबार जसपाका नेताहरूले प्रधानमन्त्रीलाई भेटेका हुन् । तर, सबै शीर्ष नेता उपस्थित हुँदा बाबुराम भट्टराई भने सहभागी भएनन् ।

बिहीबारको बैठकमा भट्टराई पनि उपस्थित हुने जसपाका नेताले नै बताउँदै आएका थिए । बिहीबार अपराह्न बसेको जसपाको बैठकले पनि नेताहरूले साँझ प्रधानमन्त्रीसँग छलफल गर्ने निर्णय गरेको थियो ।

किन गएनन् भट्टराई ?

पाँच जना नेता नै बालुवाटार जाने भनिरहँदा भट्टराईको अनुपस्थितिले हाल जसपाले सहकार्यका विषयमा प्रधानमन्त्रीसँग अघि बढाएको छलफलमा उनको असन्तुष्टी रहेको प्रष्ट देख्न सकिन्छ । जसपाभित्र प्रधानमन्त्री ओलीको तीव्र आलोचना गर्दै आएका भट्टराई यो छलफलप्रति खास खुसी देखिएका छैनन् ।

प्रधानमन्त्री ओलीले प्रतिनिधिसभा विघटन गरेयता ओलीलाई सरकारमा बस्न कुनै हक नभएको भट्टराईले बताउँदै आएका छन् भने केही दिन अघि मात्रै ‘ओली हटाउँ देश बचाउँ’ भन्दै उनले ट्वीट समेत गरेका थिए ।

यता, भट्टराईको अनुपस्थितिले जसपाभित्र दुई धार देखिएको प्रष्ट भएको छ । पूर्व राजपाका नेता ओलीसँगको सहकार्यमा उत्सुक भएपनि भट्टराई भने विपक्षमा उभिनुले जसपामा के संकट मडारिएको हो ? भन्ने प्रश्न पनि राजनीतिक वृत्तको चर्चामा छ ।

प्रतिक्रिया दिनुहोस्